早兩日絲絲至提過，去年盈利超過200億元嘅和黃（00013），佢哋嘅CEO霍建寧年薪達1.53億元，係超級打工皇帝，但相比美國企業嘅高薪舵手，霍生就收得好順吓。
絲絲尋日睇財經網站CNNMoney引述研究機構Equilar嘅報告，媒體公司Viacom嘅舵手多曼以8,450萬美元（約6.59億港元）總薪酬，成為去年美企嘅打工皇帝，期內人工增幅高達149%；去年200大美企舵手總薪酬中位數就高達960萬美元，較○九年高出12%。
睇到呢啲收入億億聲嘅打工皇帝，絲絲覺得美企舵手嘅風光時刻漸漸回歸，反而好多金融機構及銀行嘅高管人工，間唔中仲會畀人批評兼抽秤。
今年美企最高薪舵手「阿二」係西方石油嘅伊拉利，佢去年嘅總薪酬達7,620萬美元（約5.94億港元）；排第三係去年獲發7,110萬美元（約5.54億港元）年薪嘅甲骨文「揸弗人」埃利森，不過佢嘅總薪酬不加反減，係去年十大高薪舵手中唯一被減薪嘅「幸運兒」。此外，華特迪士尼嘅艾格、福特汽車嘅穆拉利及國際商業機器（IBM）嘅帕爾米薩諾，分別以2,810萬美元、2,650萬美元及2,520萬美元總薪酬，躋身去年十大高薪舵手嘅第7至第9位。
余絲韻