銀行界人才荒愈嚟愈嚴重，加人工已經唔係留人嘅唯一方法，好多公司仲要增加員工福利，要做到貼心對待員工好似對客戶咁。絲絲聽聞滙豐喺下個月有新福利，就係每位員工喺生日嘅月份都有多一日「生日假」，係有薪假，可以話係一份唔錯嘅生日禮物，即係話除非員工喺二月二十九日生日，否則以後每年都有多一日假放。
滙豐呢個計劃喺五月一日起實行，雖然唔可以應用埋喺子行恒生（00011）度，但絲絲打聽到，恒生呢間出名有人情味嘅本地行，一直都有一條不成文規定，員工喺生日當日可以早兩粒鐘收工，趁早享受歡樂時光。
滙豐出招當然唔止一道板斧，聽講佢哋仲幫員工諗埋點樣發展事業，以後每月都會內部發信畀員工，講吓有乜嘢與事業發展有關嘅工作機會，話晒要上位做大行高層梗要「周身刀，張張利」，畀員工睇吓內部轉職發展機會，好過佢哋出去搵出路，以免流失有潛質嘅人才。
除咗事業發展，做「賓卡」日日跑數跑得咁緊，有時都要抖吓，滙豐仲整埋短片放上員工內聯網，入面教埋員工點樣作息平衡以及更有效管理時間。成效會係點？絲絲肯定係做嘢有效率啲、條數跑好啲、員工健康啲、醫療津貼慳番啲啦，公司與員工都有着數。
余絲韻