市場熱線：中傳動勁量十足

中信泰富（00267）再創新高，富士康（02038）跳「森巴舞」亦回升2.76%，最矚目當然係恒地（00012），四叔蝕水都肯行使窩輪，示範乜嘢叫做「有錢大晒」，隻公司輪（00879）更大幅炒高超過30%；恒地由上月中開始大幅跑贏其他地主股，同樓價及基本因素脫節，但空軍仲未投降，尋日沽空額仍佔總成交四分之一，不過同有錢佬拗手瓜無異以卵擊石。

油價回軟有利股市

油價兩日內由113美金跌到105美金，連高盛都話炒商品要割禾青，而老古暫時亦唔使再驚高油價會拖冧個市。孖屐每日都有嘢炒，商品價升就炒油金資源股，油價跌即刻連炒兩日飛機股，民航業十二五規劃亦幫一幫手，商品價跌亦可以考慮吓工業股，德昌（00179）喺日本市場份額好細，亦有人預先炒定業績（公司三月年結）。

滬綜指尋日曾經跌穿3,000點，但倒升到3,050點收市。祖國雖然傳房貸收緊，但內房股尋日仍係偏好，恒大地產（03333）升6.6%重上5蚊。航運股卒之炒吓落後，新奧（02688）亦升6.3%創52周新高，而中燃（00384）又有消息，今次唔係傳邊個收購，而係股東爭拗，國台辦轄下嘅海峽金融發爛渣，但中燃只係微跌1.7%，有時公司愈亂愈有得炒，好似國美（00493）依家反而冇厘鑊氣。中燃旗下嘅中裕（08070）亦炒埋一份，兩日升咗66.6%，水清即無魚最適合形容魚缸。

卡姆丹克（00712）嗰位「著名投資者」揭盅，係大馬大眾銀行旗下嘅基金，其實唔算好著名啫；保利協鑫（03800）被高盛剔出確信買入名單但維持目標價，股價偏軟，太陽能股炒咗咁耐總要抖吓氣，風電股有接力迹象，金風（02208）同中傳動（00658）均升約2%，其實兩隻股舊年成績表都有滿意增長，但風電股發展遇上樽頸亦係事實。

產量增彌補毛利跌

不過，中傳動往績PE得9倍，就算今年增長放緩，一一年預測PE得8倍，仲可以跌得去邊？Capital Group上個月三度增持合共15球，每股作價12.18元至13.02元。而公司成績表亦稍高過孖屐預期，賺多43%，舊年風電齒輪產銷9GW，今年新生產線投產，產能提高到12GW，以接單狀況來講，應該有機會用盡產能，雖然毛利率可能仍會下跌，但生產量可以補數，今年盈利增長仍可以樂觀。

買PE低嘅股風險較低，而且壞消息已喺股價中反映，當然隻股有咁多蟹貨，好難期望大升，但炒波幅都山大斬埋有柴。

戰報

西王糖業（02088）+16%

古晨上周四介紹嘅西王糖業尋日搶高至2.41元，較推介日低位2.07元，足足升逾16%。

銀泰百貨（01833）+14%

銀泰百貨尋日高見12.44元，帥哥上周三推介時低位10.86元，跟到足最多賺超過14%。

古勝