絲絲講場：九建太子女初登場Sell盤

對公司業務瞭如指掌

唔好以為係「富二代」就可以懶懶閒，奉旨「世襲」，柯沛縈入行嘅經過並唔簡單，佢同絲絲講，話以前喺英國攻讀學士及碩士學位，返港後做過資訊科技及公關等行業，最近兩、三年先返公司幫手，最初喺保利達（00208）從事能源有關業務，又曾負責始創中心嘅租務，最後順理成章喺去年入咗市務及銷售部幫手。

柯沛縈對公司業務非常了解，佢話九建喺今年底至明年初會推出港島卑路乍街、九龍西洋菜街以及麥花臣球場附近共3個項目，而集團與旗下保利達喺內地及澳門亦有項目發展，不過就由其他同事負責。就連唔屬於自己範疇嘅業務都咁清楚，真係做足功課喎。

公子任執董發展企策

柯為湘除咗呢位乖女喺公司幫手之外，佢嘅公子柯沛鈞亦加入咗九建已經幾年，睇番九建嘅年報亦有介紹過，柯沛鈞今年約32歲，○三年加入九建，○五年九月升任執董，負責發展企業策略、企業規劃及日常管理工作。

（余絲韻）