日本發生地震大災難，港人發起咗好多賑災活動，絲絲八到，美國友邦保險（簡稱AIA香港）會藉着電影《雷神奇俠》（THOR）慈善首映夜，幫手籌款送暖到日本。
AIA（香港及澳門）首席執行官陳榮聲話，佢哋為慶祝成立80周年，將喺香港呈獻由出爐奧斯卡最佳女主角妮妲莉寶文（Natalie Portman）主演嘅《雷神奇俠》慈善首映夜，希望以電影嘅正面訊息鼓勵大眾。慈善首映夜活動籌集到嘅善款，將全部用作香港紅十字會支援日本地震嘅救援、重建及救災工作，客戶既能率先欣賞呢套精彩3D電影，又可關懷有需要嘅人。
陳榮聲仲話，AIA喺香港已經80年，一直積極履行企業社會責任，最近日本及中國雲南先後發生大地震，佢哋喺上月中迅即發起「AIA同心送愛捐款行動」，得到同事、業務代表及客戶嘅熱烈支持；截至三月三十一日，連同公司嘅配對捐款，已合共籌得約160萬元，全數捐贈至香港紅十字會。
今次《雷神奇俠》慈善首映夜係延續關懷愛心，為日本受災嘅人走出陰霾重燃希望，佢希望客戶能大力支持。
（余絲韻）