金管局前總裁任志剛「下崗」後，佢喺○九年九月整咗個Blog，得閒寫吓嘢，得閒又Post啲旅行相。絲絲尋日發現佢個Blog轉咗款，最大變化係換咗張相，兼有毛筆字簽名。
話時話，任總個Blog咁耐以嚟只係更新過25次（已計埋尋日Post咗文章），多數係將公開演講嘅文章擺上去，對上一次更新已經係5個月前，同啲明星日日更新真係冇得比，睇嚟佢真係好忙，冇時間講吓啲hea嘅嘢。
講番個blog，頁面張相換咗西裝相，旁邊有任總嘅中文簽名，係用毛筆寫嘅，係咪佢本人嘅墨寶就不得而知。任總成日話要學hea，學吓書法都唔錯吖！佢依家係中國金融學會執行副會長，喺個Blog度加啲中國國粹，都係唔錯嘅設計。
絲絲記得任總之前個Blog用相比較生活化，係一張喺西貢蚺蛇尖嘅行山相，呢張相亦係佢喺金管局辦公時，放喺辦公室嘅照片。任總好鍾意行山遠足，蚺蛇尖係愛好遠足者嘅首選地方，絲絲都行過，真係靚到不得了，佢揀呢張相都可以理解。離開金管局後，佢成日同老婆去旅行，去得最多係日本，所以有唔少日本旅行相Post出嚟，但呢排就唔見有類似嘅新相。
（余絲韻）