上市公司改名最緊要反映業務，咁就容易令投資者發掘到自己。香港新能源（00987）查實喺香港一啲業務都冇，點解要加「香港」兩個字呢？佢哋嘅董事總經理容伯強（Bruce）話，因為母公司係香港建設，咁公司設立時咪「隨母姓」叫香港新能源囉，不過近日有感公司名稱未能完全反映業務，所以就打算改名為中國再生能源投資。
香港新能源嘅風電項目其實喺內地，由山東至蒙古都有，目前發電量可達611兆瓦，偏偏公司叫香港新能源，反映唔到依家最賣錢嘅「中國故事」，亦令投資者有好多疑問，心諗香港有乜嘢新能源項目？Bruce話，當初「姓氏」係跟母公司香港建設，去年啲業務上晒軌道，又引入咗例如TPG等嘅投資者，家吓大個仔嘞，所以就計劃改名。除咗中文名，佢哋嘅洋名亦會由HKE改為CREI，呢個名都得來不易o架，聽講動用整個律師團搵咗好耐，先搵到呢個又靚但係又未有人用嘅名。
（余絲韻）