絲絲講場：投資紅酒有Loan路
香港係識歎之人嘅聚集地，亦有好多捉緊搵錢機會嘅投資者，永隆銀行就睇準機會推出全港首創嘅紅酒貸款，永隆零售銀行業務助理總經理鄧耀良（William）仲同絲絲講，話呢項新業務已經發咗市，短期內希望做夠5,000萬元生意，再諗吓做多啲，甚至做埋「酒花」，希望可以改善銀行淨息差兼增加收益。
最多借500萬只做現貨
永隆今次推出紅酒貸款，貸款額最高係500萬元或酒價一半，只做現貨，William話呢款紅酒貸款視乎係用供款定係借梗一個銀碼去計，息率由P-1%至P+1%（P為最優惠利率）不等，年期由3年至5年。喺銀行個角度嚟睇，呢個息率真係靚過做按揭，而且夠創新兼有市場需求。
不過依家推出只係試驗性質，William都話只做現貨，而且係根據買家向酒商訂酒嘅買價貸款，唔會跟市價例如拍賣價嚟做貸款額標準，亦承諾7日之內交到錢畀買家找數，睇嚟佢哋都好審慎。佢話香港○九年紅酒消耗量超過3,000萬支，去年投資紅酒嘅回報亦跑贏買金及買股票，可見呢個市場真係大有可為。
（余絲韻）