期指觀瀾：好倉止賺位上移24111
大市遲遲唔肯回吐，過去五個交易日，幾乎沒有「合適」的調整出現。昨日期指開24,230點之後，只係去到23,127及23,111點經已拒絕再跌，對比過去五日過千點的升幅，無貨吼位買的，真係得個等字。
人行突然加息0.25厘，但中港股市當壞消息出盡嚟炒，滬綜指在內銀A股帶動下，重返3,000點阻力樓上，作勢挑戰3,012點及3,005點兩個高位，一旦升破，量度升幅可見3,160點。
港股昨日十一點左右，已完成即市整固，企穩24,200點樓上，不過淡友在24,330至24,340點之間囤積重兵，最後四月期指以24,294點作結，升109點，全日平均加權成交價24,229點，密集交易區在24,260至24,670點。雖然筆者短期會採取只買不沽策略，但大市超買嚴重，未有貨的不妨等等。
恒指上次高位24,434點，以及黃金分割線24,361點之間，或許會有反覆，23,917點遺下的上升裂口，先補回再升，大市會更加健康，今日筆者會再將手上好倉止賺位由24,030點調高至昨日低位24,111點，只要即市跌穿，立即平倉套利。
John Mullen