市場熱線：昆能好戲在後頭

內房股沽壓唔算大

尋日成交仲破埋千億，連加息都唔驚，個市亦冇乜阻力。恒指再升134點，收報24,285點。加息利保險股、不利內房股，但尋日沽壓唔算大，富力（02777）同遠地（03377）仲有得升。

水泥股又再炒過，皆因海螺（00914）發盈喜話首季賺多倍半。老古呢排仍係睇住中建材（03323），雖然佢孭債多最驚加息，但隻股炒親就唔係人咁品。冷門類別亦可考慮旭光（00067），批完股之後儲咗兩個幾月貨終於有突破。

隻浪潮（00596）卒之發憤圖強，隻股已輸怕人，成績表睇落好嚇人，但現金多咗4億幾，收入亦有一成幾增長，衰在為咗爭市佔率搞到利潤大跌，今年有冇轉機好難講，但尋日差唔多補番個下跌裂口，睇走勢圖0.65元係蟹貨密集區，到時應會有第一重阻力。

近兩日「蒙古系」有蠢動，蒙古能源（00276）、蒙古礦業（01166）、蒙古投資（00402）相繼打入升幅榜，差隻正牌蒙古人打骰嘅蒙焦（00975）未郁。蒙古最多煤，但煤股因為電煤唔畀加價而近日逆市下跌，不過，金價創新高就令金股好醒神，五礦資源（01208）話做海外礦業旗艦冇花假，又重金買銅礦，尋日股價先跌後回穩，海外買礦郁啲都要幾百億，難免要做伸手牌，唔做靚個股價點伸手？

北控（00392）喺分析員會議話將今年燃氣銷售增長目標由15%調低到10%，股價當然唔多掂，但同北控一齊揸住北京燃氣股權嘅昆侖能源（00135）就連日創新高，隻股上周五突破舊年尾收購北燃時嘅高位之後，在下已建議追得過，昆能呢兩日仍係慢火煎魚，佢嘅走勢真係好怪，舊年大部分時間喺10蚊邊上落，年尾卒之有料到，但跟住玩三角形走勢再收貨，到近排又發力。

手機可睇即秒股價

雖然近日油價升到109美金，對呢隻仲係大半隻石油股嘅昆能係明顯優勢，但其實隻股炒時唔多睇外圍環境，同恒指、油價、燃氣股升跌完全無關，總之時機成熟就落鑊，至於幾時再注資要問阿媽中石油（00857）。不過，老古長期推介昆能亦唔理咁多，如果隻股係長線上升嘅話，就一於揸到實，好似另一愛股一拖（00038）揸住佢就家山發。

股民以往想睇免費即秒股價，只能夠上money18網站，但依家方便好多，用緊iPhone或者Android手機的，可以下載money18應用程式，用手機可以睇到免費即秒股價，至於其他手機用戶，亦可以到m.on.cc，同樣睇到免費即秒股價，money18一於賣大包，益大家。

戰報

中星集團（00055）

中星集團尋日搶高至0.495元，跟帥哥於上月二十五日低位0.375元上車，最多可賺32%。

山水水泥（00691）+16%

古晨上月二十四日推介山水水泥，當日低位6.73元，尋日再炒上7.8元高位，跟足賺近16%。

古勝