孖妹缸湖遊：親子理財絕非小兒科

近年股壇陸續有「少年股神」出現，佢哋年紀輕輕，但炒股功力厲害，廿歲出頭分分鐘已經係百萬富翁。事先聲明，孖妹絕對唔係鼓勵小朋友或青少年炒股，不過炒股又唔係邪惡嘅事，只要父母識得向子女灌輸正確嘅投資知識及概念，買股票絕對係正當投資行為。正如中銀國際證券金融產品部執行董事雷裕武及正富資產管理董事總經理龐愛蘭，佢哋一早已向子女教授投資理財知識。

雷：中銀國際證券金融產品部執行董事 雷裕武（Moses）

龐：正富資產管理董事總經理龐愛蘭（Scarlett）

從小灌輸正確金錢觀

高妹：兩位嘅投資理財知識咁豐富，你哋會點樣向子女解釋金錢嘅定義呢？

　雷：好多父母都覺得金錢係邪惡嘅，佢哋成日會話：「只要錢過手，人就會變壞。」呢一代嘅物質太過豐富，既多挑戰又多引誘，我認為父母唔可以再用舊思維及模式向子女灌輸金錢觀，愈早讓孩子學懂理財一定係好事，重點就係教佢哋明白「如何管理有限嘅金錢」以及「金錢唔係萬能」。

　龐：擁有金錢唔等於擁有成功及快樂，而且金錢亦會有買唔到嘅嘢，例如健康、親情、學識等。當囝囝讀高小時，我就教佢投資理財知識，令佢明白金錢本身冇好壞之分，但一定要運用得宜，因為正確嘅投資理財觀對未來人生規劃大有幫助。

祺祺：果然係新一代嘅「富爸爸」及「富媽媽」！唔知以前父母又點樣教你哋投資理財呢？

　雷：上一代嘅父母十分主張儲蓄，記得我細個時，阿爸成日都叫我儲錢，但又唔解釋為乜要儲，佢又會叫我唔好亂買嘢！所以阿爸冇教過我去買股票，但就令我從小養成良好嘅儲蓄習慣。

　龐：我媽媽講過三個好重要嘅觀念：第一，知識係最寶貴嘅財富資產；第二，當個人有能力時要回饋社會；第三，買樓，因為係最穩陣嘅投資工具。所以我長大後仍不斷讀書進修，依家亦盡量參與各方面嘅義務工作，而我喺香港及溫哥華亦有投資物業。

夾份買股 教睇管理

高妹：Moses，我知道你有一仔一女，大仔8歲，細女5歲，平時你會用乜嘢方法教佢哋理財呢？

　雷：大仔讀幼稚園高班時，對數字有基本認知，我會帶佢去超市買嘢，畀10蚊佢自由購物，透過「格價」過程令佢明白「多與少」、「夠唔夠」嘅金錢消費概念；大仔讀小一開始，我就定時定額畀10蚊零用錢佢，令佢擁有自己嘅財富，從中學懂「3S」──儲蓄（Saving）、購物（Shopping）及捐助（Sharing）。至於細女，基本上都係沿用呢個模式去教。

祺祺：Scarlett，你嘅囝囝已經18歲，依家去咗澳洲準備明年升大學，聽聞佢喺9歲時已經學人去買基金喎！

　龐：嗰時我同佢仲設計咗一套理財小富翁遊戲，一邊玩一邊學習複息計算；9歲開始，佢就用零用錢去買基金，買乜嘢完全由佢去決定。記得當年佢就揀咗中國及美國市場，冇揀到日本市場，其後日本市場表現好好，佢就有啲後悔，覺得日本升咁多，但美國及中國就冇乜點升。後來問佢唔揀日本嘅原因，佢就答：「因為喺學校睇書，知道日本人打中國人，所以我唔想畀錢佢哋賺。」

祺祺：你囝囝好有正義感喎！不過投資涉及情感因素就未必係好事喇。

　龐：所以我就教佢，投資決定唔應該包括私人感情因素，要理性而唔可以感性。之後我哋夾份買滙控（00005）股票，同佢講股市有循環性，指數會升就會有跌，買股票要睇企業嘅管理層質素、業務發展前景等要點，因此就算滙控跌到33蚊，我哋都冇驚，而且仲有供股，揸到依家都冇沽出。

儲蓄夠數 輔助入市

　雷：孩子從小就應開始學習理財，幼稚園至小學階段可以先學理財概念，上中學之後才慢慢灌輸投資知識亦未算遲。當小孩子已經儲蓄「第一桶金」，父母就可協助佢哋嘗試投資，例如買入盈富基金（02800），一手成本亦只不過係萬零蚊。最後，我亦要提醒父母唔好輕易放棄管教嘅主動權，因為你唔教，傳媒、消費文化及同輩都會「爭住」幫你去教，到時價值觀定咗，要改變就難上加難。

雷裕武著作：《再富，也不可富孩子》

內容簡介：雷裕武結合自身經驗與財經知識，通過眾多實例個案，正視「港孩」金錢觀三大缺失、「夾心父母」嘅困境以及「影子父母」嘅理財盲點，並配以親子理財遊戲教大家如何培養孩子嘅理財觀。

龐愛蘭著作：《理財的階梯》

內容簡介：龐愛蘭認為，孩子愈早累積財富管理嘅學問，將來管理人生就更容易。呢本書除咗教孩子如何管理「利是錢」，並提供各種切合需要嘅投資計劃，幫助家長與子女一齊拆解消費迷思。

33.3%股友首季有賺

今年首季發生咗唔少對股市帶嚟衝擊嘅事情，如日本核危機、中東北非局勢緊張及歐洲債務危機等，現時恒指水平仍與年初時相若，算係有所交代。總結今年首季，你嘅股票投資成績如何？據今期《東方產經》網上民意調查，截至上周末晚上6時結果顯示，33.3%人話有賺，47.7%人話蝕錢，17.4%人話打和，其餘1.6%人就話未有投資。

高妹、祺祺

若有料報畀高妹同祺祺或有嘢問，可電郵money.biz@opg.com.hk