市場熱線：恒盛大成交突破

昆侖能源（00135）上周五破位，高過舊年尾宣布收購北燃嗰時嘅高位，隻股升勢一段段，古勝認為依家上車有心未算遲。吼昆能之時，亦可跟手留意埋北燃嘅「拍乸」北控（00392），舊年賺多僅一成唔多滿意，上周五股價即插4.7%，但已從高位回落27%，已足夠反映業績因素。

車股銷售前景未明

維奧（01164）有廣東核電借殼上市，復牌狂升1倍半，而廣東核電揸住16.6%嘅銀建（00171）咪變二奶？銀建仲啱啱以每股3蚊批股，間公司有淨現金，仲揸住永暉焦煤（01733）嘅股票隨時可套現，究竟想點冇人知，但有一定值博率。

汽車股上周五逆市下跌，有傳聞話限購令會由北京擴展到其他城市，雖然可信性唔高，但孖屐驚住三月賣車成績同二月一樣咁差，而日本零件供應斷裂甚至影響合資車廠生產。汽車股暫時有唔少不明朗因素，等月中公布完賣車成績之後再入貨較穩陣。

近兩日跌得較勁嘅係億和（00838），公司喺業績報告承認日本地震對佢哋嘅定單增長有影響，皆因公司產品要靠日本零件組裝，所以供應鏈面臨中斷，億和末期息派得少過中期息亦可能有玄機，至於有幾大鑊要管理層至知。

祖國要地方政府公布房價調控目標，結果得啖笑，限價變漲價，得「天子腳下」嘅北京提出「穩中有降」，上海、廣州、深圳准許樓價升，但升幅唔高得過GDP，有一成更加喺限期前未交功課，又變成上有政策、下有對策。老古呢兩、三個禮拜推介過唔少內房股，總算搵到餐晏仔，但內房股已累計升咗唔少，要揀亦要揀啲落後股，恒盛地產（00845）係其一，由低位計升唔夠兩成，同早前推介嘅恒大（03333）升咗四成創埋新高冇得比。

恒盛截至舊年尾土地儲備共1,915萬平方米，有77%位於二三線城市，每平方米成本僅1,270元人仔。恒盛舊年雖然未能達到銷售目標，但全年仍賺36億人仔，計一○年PE得4倍零，平嘢冇好係古訓，皆因公司總共孭債約138億人仔，屬於高風險類別，未來點樣搵錢起樓係重大問題，但內房股氣氛轉好，短線可炒落後，長線就高風險高回報，總之針冇兩頭利。

手機股民又有着數

有睇開money18的讀者，當然知道這個免費平台有幾好用，依家用緊iPhone或者Android手機的股民，更可以下載專用程式，介面靚靚之餘，更可以免費用盡money18大部分主要功能，例如睇走勢圖、相關新聞、監察投資組合變化等，無形中多咗個近身好幫手。

戰報

友川集團（01323）+16%

古晨上周五話冷敲友川，即日落鑊，以當日低位0.97元計，升抵高位1.13元，即日最多賺逾16%。

第一拖拉機（00038）+19%

一拖上周五破位，高見10.1元，古勝上月二十四日已吼實，當日低位8.48元，跟到足賺逾19%。

古勝