Million大追尋：百萬橫財點算好？

把100萬全部儲起或者拿來投資，雖然符合理財增值的目標，但適當的獎勵也許是很好的充電劑，幫助我們努力向前，究竟大學生們會如何利用這個「天降百萬」？今期《Million大追尋》透過街頭直擊，了解一下大學生的理財智商，以及請來恒生管理學院院長兼金融學教授蘇偉文分享他的想法，為同學們指點迷津。

儲起50萬 保守型

樹仁大學新聞系三年級學生Alvin：「在香港得100萬真係唔多！如果我有100萬，其實真係做唔到啲咩！有1,000萬又唔同講法喎！如果我真係突然間有100萬，我可能會用10萬蚊去旅行，或者買自己鍾意嘅嘢先！點都要滿足咗自己先嘅！」「然後剩低嗰50萬就會儲起佢，其餘嘅就拎去投資風險低嘅股票，希望可以賺番少少，保值嘛！通脹又係咁升，如果唔拎去投資，容乜易擺多幾年就無晒呢？」

蘇偉文表示：「用10萬去旅行？畢業旅行都唔使用咁多錢啩？儲起50萬咁，只係用40萬去投資，呢位同學似乎保守咗啲喎！我建議同學可以用多少少錢去投資都唔怕，反正後生，蝕得起，之後又唔係搵唔番！後生仔應該留番啲錢用嚟讀個Master（碩士學位），進修吓咪幾好！」

75萬留學 明智類

樹仁大學新聞系二年級學生Stephanie：「我就會將舊錢分開兩部分！由於我自己唔係好識得投資，我會拎25萬去搵投資顧問幫我投資一啲高風險嘅產品。如果要買股票，就會買滙控（00005），同埋一啲與黃金相關嘅產品。反正都係不勞而獲得番嚟嘅錢，高風險輸晒都唔怕，我搏到盡架喇！另外，我會預留75萬去美國紐約留學，讀兩年ART，我會好畀心機咁讀書，為自己增值！」

蘇偉文指出：「讀書增值係一個明智嘅選擇，但預留75萬元讀書就多咗少少，70萬都好夠架喇！咁如果係70萬嘅話，就有30萬投資喇！除咗買股票，30萬可以置業，買個上車盤，又可以畀到10%首期！當然你唔好諗住市中心，或住豪宅啦！」

買模型開展 理想派

科技大學工管系三年級學生CY：「如果我有100萬，我就會去唔同嘅地方旅行，收集唔同地方嘅英雄概念產品，例如日本嘅鹹蛋超人模型呀、美國嘅蜘蛛俠poster等。如果夠錢的話，應該會搵埋太空人同埋機械人1:1嘅模型。之後我就會租一個地方開展覽，咁就可以收番啲入場費啦！可以實現夢想，又可以賺到錢，都唔錯呀！」

蘇偉文稱：「呢位同學喺咪屋企唔使開飯先？從佢個計劃咁睇，佢只係為興趣而唔係為生活！雖然可以開展覽收入場費，不過，外國就有好多例子都說明咗開展覽多數都係慘淡經營，咁當然如果你好有品味，吸引到好多人入場就另計啦！」

想創富先學投資

講完學生點用100萬，究竟蘇偉文又會點用「天降百萬」？

恒生管理學院院長兼金融學教授蘇偉文說，100萬對他來說不是一個大數目。如果有100萬，他將會全數用作投資。那麼，投資甚麼產品才合適？就見仁見智了。

蘇偉文平日工作忙碌，又要照顧家庭，比較難跟貼大市，會考慮基金嗎？他坦言，因為基金的手續費不便宜，除非他有鍾愛的新興市場，否則都不會選擇投資基金。「基本上，我指的投資，都是買賣股票。想要賺額外的錢就要識得錢搵錢，單靠儲蓄並不足夠，想要為自己創造財富，就得學會投資！」

給年輕人的理財忠告

1.不要胡亂花費。

2.自我增值是最好的投資。

3.必須投資，但大前提要學懂投資之道。

4.投資始終是要自學的，不一定可找到適合的人代勞。

5.應該設法增加財富，只將金錢儲起就太保守了！

資料來源：蘇偉文