絲絲講場：彭淮南用iPhone唔撐HTC？
曾七度獲《環球金融》雜誌評選A級，有「7A總裁」美譽嘅台灣央行總裁彭淮南，一啲都唔輸蝕畀其他財金部門嘅阿頭，為咗隨時掌握最新嘅財金資訊，佢都有用iPhone。但咁樣咪好唔畀面「自己友」HTC？
「我只係未買啫」
智慧型手機大行其道，台灣嘅財金首長大都配備iPad，彭淮南深知呢啲潮物嘅重要性，所以特登搵咗央行資訊部門嘅主管，幫佢惡補點樣使用新科技產品。佢好老實話自己冇iPad，但就有用iPhone，出埠仲一定要用，因為喺外國真係好好用。
記者知道佢咁緊貼潮流，都忍唔住發出驚呼聲，但點解唔揀本土品牌HTC？HTC嘅股價會唔會應聲下跌架？彭淮南即刻補上一句：「我只係未買啫！」咁總裁用iPhone又有乜嘢心得？眼見離題，佢快快回應：「呢啲與貨幣政策無關！」
余絲韻