今年出任銀行公會主席嘅和廣北，平時畀人印象係好嚴肅，尋日絲絲就見識到佢幽默嘅一面。喺尋日銀公例會後，和廣北照例出嚟與傳媒傾吓偈，一班攝記見佢出現，當然蜂擁上前影相，點知和總影影吓相時突然爆肚話，其實佢個樣一直冇變，點解次次都要影相？攝記哥哥亦反應敏捷咁話：「咁我日日都要食飯啦！」和總聽到後都忍唔住微笑。
和總好有風度咁企喺度畀攝記任影，影到七七八八時仲反幽攝記一默：「多吃（意即影相）一點。」換嚟全場陣陣笑聲。唔單止咁，記者會途中有一家傳媒支咪冧咗，和總就暫停講話，耐心咁等人整番支咪，重新開始時佢又搞笑咁話，唔記得咗頭先講咗乜嘢。
絲絲覺得，銀公除咗促進銀行業健康發展之外，與坊間溝通亦好重要，每次都有一大班記者喺銀公例會守候，如果和總保持有問必答及親切作風，相信傳媒界會相當欣喜。
余絲韻