本港「賓卡」喺日本災後重建過程中找尋投資機會之餘，亦不忘為日本災民籌款，絲絲聽講一班「賓卡」諗住搵全球最年輕搖滾結他手、健力士紀錄保持者宮澤佑門（Yuto Miyazawa）領銜演出，喺本月十四日假中環四季酒店開慈善演唱會，並將所有收入捐畀喺美國註冊嘅日本協會旗下地震救濟基金。
呢個演唱會嘅門票盛惠一千大元一張，但為咗做善事，相信各位歌迷應該冇乜投訴；另外，演唱會仲有現場拍賣，拍賣品包括球王比利嘅簽名球衣、拳王阿里嘅連框人像照等。聽到詳情咁吸引，算係半個「哈日族」嘅絲絲都好想幫手出一分力。
雖然社會各階層都盡力為日本打氣，但「核恐慌」仍在擴散中，好多跨國投行都需要聘請核物理學家及專家，為員工及其家人提供心理輔導以及潔淨食用水，以安撫佢哋嘅恐慌心理。其實絲絲都好希望日本能夠盡快妥善處理今次嘅核危機，等大家唔使今日搶鹽、聽日搶豉油喇。
余絲韻