市場熱線：中電信憧憬收購

內房股尋日又升過，尋日亦係各城市定樓市調控目標嘅最後限期，有啲尚舉棋未定，結果得北京要求「穩中帶降」，其他城市只係話樓價升幅唔可以高過GDP，同隻眼開隻眼閉冇乜分別，內房股唔升有鬼。

雨潤隨時因禍得福

尋日講康師傅（00322）宣布加價成為眾矢之的，結果冇幾耐已收回成命，顯示阿爺已經軟硬兼施唔畀加價，康師傅尋日股價即刻腳軟，睇嚟食品飲料股暫時仍要避忌吓。不過，古勝嘅長線投資對象雨潤（01068）買得之餘覺得仲可以加注，據內地報章報道，雙匯嘅專賣店竟然掉轉槍頭賣雨潤，可見中國人做生意的確夠靈活變通，如果雨潤可以「食埋」最大競爭對手嘅市佔率，今次肥過隻豬。

彤叔隻周大福卒之計劃上市，忍咗咁多年先話上市，無非都係零售業好景帶動估值，而六福（00590）、謝瑞麟（00417）等尋日亦炒高。

在下尋日講嘅第一太平（00142）同中建材（03323）都繼續升，中建材成績表其實唔算標青，但10送10紅股，炒家埋晒位，呢個零月升咗10蚊咁多，瑞銀亦叫人唔好沽住，維持37.5元目標價不變。

老實講，呢幾日放榜最後衝刺期，老古都唔得閒睇得咁多，好多只係粗略望吓，但股價就同成績表唔成正比，安莉芳（01388）中午派完業績後勁跌，海信科龍（00921）賺多兩倍但亦跌6.5%，神威（02877）上個禮拜業績後高位插咗兩成，要睇上次低位18.16元有冇支持；反而威勝（03393）賺少27%，但尋日大幅反彈，唯一解釋係跌咗咁多已反映晒負面因素。

老古尋日話聯通（00762）唔怕趁低吸納，話咁快已回升，至於中電信（00728）舊年成績表符合預期，呢幾日股價反覆上升，正挑戰4.75元呢個雙頂，大家睇緊佢幾時向阿媽收購CDMA網絡資產，同埋幾時推CDMA版「哎瘋」，照計破頂係遲早嘅事。

3G上客量持續理想

依家祖國移動（00941）已成為公用股，聯通同中電信成為高增長股，孖屐都睇好今年3G上客數目，經過舊年觀察期，好多人會較放心使用，而有大行估計中電信今年3G上客會達1,700萬戶，手機補貼支出則會減少，估計每年盈利可以有雙位數增長。

古勝一向係聯通長期捧場客，早前亦建議70蚊樓下買祖國移動當收息，但如果中電信成功破位嘅話，應該仲有5%至10%左右嘅上升空間，短線可以先睇中電信。

戰報

第一太平（00142）+18%

股博士上月二十三日揀嘅一太尋日落鑊，高見7.31元，於推介日低位6.19元上車，最多賺逾18%。

駿新能源（00091）+29%

駿新尋日炒上高位0.098元，帥哥上月十五日推介時低位只係0.076元，跟到足賺近29%。

古勝