孖妹缸湖遊：核恐慌衍生危轉機

日本核事故搞到輻射滿天飛，依家仲話輻射食品危機會殺到香港。其實只要大家肯節約用電，世界上又點會有咁多核電站呢？想知點樣愛護地球？聽吓金融界「環保女俠」華富嘉洛證券資產管理部董事陳蓓敏嘅環保心得，同埋核輻射危機之下嘅投資機遇喇。

自從日本爆發核輻射危機，搞到香港之前出現「盲搶鹽」事件，由此證明只要市場出現壞消息，人類就會因恐慌而做出瘋狂行為，其實防輻射方法好簡單，做多啲環保咪得囉。所以今次孖妹搵來一位「缸湖老友」陳蓓敏，幾年前佢跟老公移民咗去荷蘭，諗住全心全意做個相夫教子嘅好太太，後來因為獲現時老闆賞識兼力邀出山，於是決定重出「缸湖」。陳蓓敏再次發功大談投資策略之餘，仲會教大家環保小貼士，一於齊齊對抗輻射，拯救地球。

陳：華富嘉洛證券資產管理部董事陳蓓敏

高妹：你老公係外國人，兩年前你就移民去荷蘭，今次再戰「缸湖」，你仲帶埋老公同囡囡返香港，依家適應番生活未呀？

　陳：我覺得香港嘅空氣污染好似愈來愈嚴重。其實荷蘭嘅城市規劃好簡單，政府亦會限制土地發展用途，即使有眾多樹林都唔會隨便開發，而香港就滿布高樓大廈，所以我老公成日話，喺香港都見唔到個天嘅！

祺祺：其實香港人多車多唔單只會造成空氣污染，仲會產生埋噪音污染。咁你嘅環保生活又係點架？

　陳：由於現時我住嘅地方，係無擺放垃圾分類箱，所以我會自行喺家中將垃圾做好分類，希望可以幫到清潔嬸嬸去清理囉。而且，我十分主張「量能而為，量能而用」，即係從生活上節約用電、用水，好似我幫囡囡沖完涼，都會將啲沖涼水循環再用，用來抹地、抹嘢咁囉。

高妹：嘩，你嘅囡囡只得一歲半，但我相信佢一定會感受到你嗰份環保心意嘅！

　陳：雖然我只有一個女兒，大家一定以為佢會受到萬千寵愛，但其實我都會問朋友拎舊衫架！一來小朋友大得好快，二來啲衫仔啱着嘅話，Why not？到小朋友唔啱着喇，我又會再轉送畀人，或者捐去慈善機構。我一直以來都好鍾意做針織，如果有啲布料質地好，大家仲可以將布料做成布公仔，咁小朋友又可以有多一件玩具喇。

核電相關股難再大跌

祺祺：你好厲害呀，你根本就係「環保媽媽」，完全做到物盡其用呀。

　陳：唔好咁講，其實響應環保一啲都唔困難，只要大家肯用心去做就得。好似我去飲茶，都唔會叫太多點心，避免眼闊肚窄，另外又會自行帶飯盒去裝剩餘嘅食物，而唔用酒樓嘅發泡膠盒。如果我平時唔需要出外見客，我就多數會帶飯返公司。

高妹：我相信，如果人人都可以學你咁重視環保的話，咁每個國家嘅核電站一定會減少好多，咁大家就唔使再驚核輻射喇。

　陳：老實講，日本核輻射事件唔會令其他國家對發展核電計劃一刀切，因為核發電嘅成本效益太大，相信未來各國只會加強核發電安全、監測，以及危機處理等方面措施。由於全球人口只會不斷地增加，用電量不斷上升，即使荷蘭向來推行風力同水力發電，但當地政府都重新研究核發電，就知道停核係不可能的事。

祺祺：等我仲以為啲國家會驚咗核發電，於是造就之後啲再生能源股板塊可以長炒長賺添。

　陳：我相信與核電相關嘅股份會受影響，例如東方電氣（01072）、上海電氣（02727）、哈爾濱動力（01133），它們股價會短期受壓，但我知道他們手上與核電相關嘅計劃唔算太多，未來股價未必會再大跌，卻會保持穩定，大家可以先參考市場對呢啲板塊嘅估值如何，然後趁其股價落後時買入都未遲。

恒指有機會衝兩萬八

高妹：其實我未買過再生能源股架！如果我依家先追入，風險係咪好大？

　陳：日本發生核輻射，市場對核發電戒心增加，於是積極去推啲太陽能發電嘅股份，如保利協鑫（03800）、卡姆丹克太陽能（00712），呢兩間企業都係做環保發電、生產用於太陽能發電嘅多晶硅為主。不過，由於早前市場資金已轉移流入呢啲板塊，所以我覺得短炒機會仍有，但投資者出入時都係小心為妙。

祺祺：講真，今年環球市場咁多嘢發生，我對港股嘅信心都有限，都有諗過買啲「穩陣嘢」長擺算數。

　陳：我覺得今年恒指個底係20,000點，如果升穿26,000點，就有機會上試28,000點，上升動力都係靠資金推動。講真句，如果你又驚核電股，又驚太陽能股，咁不如買石油股及電力股仲好喇，好似我就傾向揀現時估值唔算高嘅中國石油（00857）、中國石化（00386），又或者係中電控股（00002）、華能國電（00902），最重要係佢哋息口夠高嘛。