市場熱線：世房大行齊唱好

依家資金亂咁轉，和黃（00013）未到業績已腳軟，但大笨象（00005）接力，中行（03988）業績好過預期，上周五升2.6%，仲帶起埋其他內銀股，但老古覺得內銀追唔過，業績好係「舊屎」嘅事，今年要上繳兩成存款畀阿爺做準備金，壞帳率亦可能回升。當然，內銀無論PE同PB都勝在夠平，跌亦跌唔得點出樣。

一拖無懼業績魔咒

水泥股上周五創新高後多隻倒跌，得中建材（03323）同金魚（02009）仍頂得住，金魚A股更加升停板。日本食物食水受污染搞到人心惶惶，奶粉股繼續勁炒，中綠（00904）連升6日，連中糧（00606）亦炒起，但最勁都係老古日前推介嘅一拖（00038），絲毫無懼「見光死」魔咒，升8.8%平咗五十二周新高。

周五見光死嘅業績股包括奧普（00477）、天大石油（00839）、廣南（01203）、利豐（00494）、飛毛腿（01399）等，但有個別異數，好似精電（00710）同慶鈴（01122）就借業績炒起。

雙匯嘅瘦肉精風波搞到其他豬肉商都受影響，業界話有六成生豬有問題，唔係瘦肉精就係濫用抗生素，其實依家豬牛雞邊樣冇問題呀？要快高長大就要「加料」催谷，除非你學回教徒戒食豬肉啫，所以相信事件只係短暫性質。雨潤（01068）上周五因問題豬事件回軟2.4%，但老古仍認為隻股長線買得過。

內房股比大市更早一、兩日反彈，好耐冇見過可以跑贏大市，而且今次並非彈一、兩日貨仔，而係出現幾支大陽燭，雖然上個禮拜阿爺再推出「明碼標價」政策，但同時由五月開始降低咗住房交易手續費。其實，當保障房相繼落成之後，窮人居者有其屋，阿爺對商品房嘅管制可能會冇咁緊。

多元化發展減風險

老古喺上個禮拜推介過內房股恒大（03333）同五礦建設（00230），今日再斬四両推介世茂房地產（00813），內房股好似隻隻差唔多，但其實好大分別，世房嘅特點係多元化，除咗住宅之外，仲有寫字樓同酒店，早兩年已話「三頭馬車」發展，就算阿爺加強鬥地主，佢嘅風險亦相對較細。

世房已經派咗成績表，大行評價都幾正面，細摩、大摩同花旗畀佢嘅目標價分別係16元、17.8元同20.48元，現價PE係7倍，NAV折讓超過五成，今年以來股價表現落後其他內房股，值博率亦較高。

戰報

高寶綠色（00274）+19%

古晨上周五推介高寶，以全日低位0.137元開出後，一度搶高至0.163元，即日勁賺近19%。

金隅（02009）+24%

高仁本月十七日睇中隻金隅，當日低位10.8元，上周五最高炒上13.36元，短線走番轉賺近24%。

古勝