中行（03988）舊年盈利首次突破千億元（人民幣‧下同），惟管理層人工縮水。絲絲尋日見到成班中行管理層，忍唔住問佢地點解管理層人工愈來愈少，相比好多歐美銀行大班，絲絲真係戥內銀大班唔抵，如果EQ唔夠，真係好容易「心理不平衡」。
行長李禮輝氣定神閒咁話，國有控股嘅金融企業高管薪酬有規限，舊年開會時，就已畀人問佢，明明業績愈來愈好，但係高管薪酬就愈來愈少，究竟會唔會因為咁而「心理不平衡」。
李行長就不慍不火咁話，佢今年「心理很平衡」，與財政部比較，工作要比佢自己更加辛苦，但係報酬比起佢依家嘅水平低好多，李行長又話，會認真貫徹執行有關薪酬政策。
最後，李行長仲要好大方得體咁話，唔理薪酬係點樣，作為中行高管其中一名成員，就係社會、國家寄予佢哋信任，一定會好好履行職責「當好行長」。話音剛落，全場中行（或者中銀香港）員工立即報以熱烈掌聲。
翻查中行年報，無論行長定係董事長，人工都大縮水超過三成七。敬業樂業嘅李行長薪酬跌至92.3萬元，而董事長肖鋼都縮至得番100.8萬元。
聽完李行長咁講，相信其他國有商銀高管份人工都唔慌會大升啦。
余絲韻