絲絲講場：買基金嚴例嚇走投資者
雷曼迷你債券「爆煲」搞到全城大混亂，證監會及金管局之後補鑊，加咗好多中介銷售嘅繁複過程，話就話增加投資者保障，可惜唔係所有投資者都「領情」，有調查話好多人驚咗呢啲過程，掟個大彎走去買風險更高嘅產品，唔通真係好心做壞事？
轉投股市添風險
富達基金委託市場調查公司喺上月訪問咗1,019名年齡25至60歲嘅本地投資者，發現對於透過中介人買基金時要為投資者作風險評估呢啲新例，有38%受訪者認為銷售過程太長，15%受訪者感到不安，32%受訪者更會因而放棄購買基金，改為買金、債券、外匯投資嘅大有人在；最令人意外嘅是，當中首選轉買個別股票嘅竟高佔76%，轉而抽新股嘅就有25%，搞到有關新例似乎有本末倒置之嫌。
富達基金香港區董事總經理程劍慧話，由今年六月起，投資者喺認購前仲要先通過對衍生工具產品嘅知識測試，58%受訪者講明會因而避免投資衍生工具產品，最慘係法例仍未有對衍生工具產品給予清晰定義。「我哋惟有聯同業界做多啲投資者教育，盡力釋除投資者嘅誤解，避免令投資產品嘅風險、回報過分混亂。」
余絲韻