絲絲早前見到內地媒體係咁報道富力地產（02777）旗下嘅樓盤質量有問題，一時話以垃圾填天花板，一時就話外牆變形、滲水……富力老闆李思廉尋日難得嚟到香港為公司業績解畫，當然要問吓佢到底係乜嘢一回事喇！
李思廉話關於質量問題，其實每家公司都梗有啲o架喇，特別係富力一年嘅交樓面積達到二百幾萬平方米，如果施工隊入面間唔中有啲質素差嘅人都唔出奇，而佢自己亦好歡迎媒體去監督佢哋，若報道係屬實嘅話，亦會好快去跟進。不過對於上次內地媒體嘅報道，佢個人就覺得好誇張，而且仲話被用埋啲惡毒嘅用字嚟惡意攻擊添！
話晒買樓係人生大事，好多人用畢生積蓄嚟買樓，睇到呢啲報道或者都會被嚇親唔敢買，好在李思廉話富力質量監控一向好嚴格，又話唔係好多人關注嗰啲報道，暫時睇唔到對富力有明顯嘅影響。
余絲韻