對沖基金蓋倫集團涉嫌內幕交易嘅審訊喺美國進行得如火如荼，高盛行政總裁布蘭克費恩前日「紆尊降貴」出庭作證，點知竟然畀律師問及好多私人生活習慣，搞到冇晒私隱。
布蘭克費恩穿着深色西裝、白襯衫配藍領帶出庭，佢用咗超過3個半小時作供，但律師問嘅部分問題相當「冇厘頭」，包括問佢喺邊度長大以及讀邊一間高中，佢惟有照答，而喺過去三周審訊期間從來冇證人被問及呢啲私事。唔單止咁，律師仲問佢閱報習慣及管理風格，原來佢經常睇《華爾街日報》，又會每日睇住高盛盤數，鍾意用留言多過電郵；當市況不穩時，佢仲會與董事局成員單對單突擊對話。
講番單案，蓋倫集團聯席創辦人拉賈拉特南涉嫌喺○八年十月，從高盛前董事古普塔身上得到高盛將獲巴菲特注資50億美元，以及高盛季度業績等內幕貼士，繼而進行內幕交易圖利，因而被捕。布蘭克費恩作供時直指古普塔違反該行嘅保密條例。
至於「股神」嗰50億美元注資，佢就話有咗呢筆巨額資金，可安撫投資者嘅不安情緒。律師隨即問：「咁高盛從問題資產拯救計劃（TARP）獲得嗰100億美元又幫到啲乜呢？」惹來庭上一陣哄笑，布蘭克費恩回答話TARP金額更高，附帶條件亦較佳，因為政府嘅息口冇巴菲特咁「乸脷」，仲話如果早知政府會注資，當初就唔使周圍搵救星喎！
余絲韻