市場熱線：中鐵買貨咪手軟

葡萄牙內訌隨時又向歐盟求救，5年國債孳息超過8厘，西班牙錢莊亦被穆迪調低評級，但孖屐趁災難入貨，所以仍係亢奮。今日又到禮拜五，A股會唔會有加息恐懼症呢？但人行副行長易綱喺香港話「依家利率水平好舒服」，加息又好似冇咁快，但阿爺做事估你唔到，所以唔好咁老定。

金軟用高息誘股東

今日有過百間公司派成績表，呢排多數仍係見光死，好似神威（02877）、中化肥（00297）、中遠國際（00517）等，但藍籌股反而有人炒業績，內銀股近日就好醒神。恒地（00012）同合和（00054）派完成績表之後，大股東急急腳增持，長和（00001及00013）下周二派業績之後，超人買貨嘅機會相信會好高，和黃尋日再升1.27%穿埋50日線，舊年零售、石油同電訊業都好景，的確有可炒之道。

金山軟件（03888）派錢，股價升8.25%，中遠國際都派高息，但股東嫌派得唔夠，所以尋日創新高之後倒跌6.5%收市。金軟嘅成績表其實差到痹，○九年第四季經營溢利賺1.3億人仔，舊年第四季賺得3,368萬人仔，要靠賣間聯營公司獲特殊收益1億人仔頂住，再加埋派4毫子「息」誘股東。

至於中遠國際亦派38仙息，但孖屐預咗佢一係向阿媽買資產，一係將賣遠地（03377）嘅錢派晒出去，所以業績公布後令孖屐感到失望，但公司喺收市後記者會話今年會用30億向阿媽買船舶燃油項目，應該有得反彈。

國務院前日開會，研究將「十二五」垃圾焚燒比重大幅上升，包括鼓勵用垃圾焚燒發電，仲會提高垃圾處理費同財政補貼，香港上市公司有做垃圾發電嘅得光大國際（00257），走勢雖然較悶，但長線好有潛力。

尋日水泥股又再升過，「基建三寶」就名副其實個別發展，最勁係中交建（01800），其次係中鐵（00390），最衰係中鐵建（01186）。中鐵建喺沙特揩大鑊之後，喺利比亞又踩地雷，亦涉及京滬高鐵違規招標事件。不過，好在中央已拍心口話高鐵項目會繼續去，中鐵建呢排咁多事，所以古勝仍係較鍾意中鐵。

估值處偏低水平

中交建呢排急升超過三成之後，估值已經同「兩鐵」拉近咗好多，中鐵下禮拜三派成績表，一○年PE估計唔夠11倍，已經係上市以來最低水平，以依家嘅估值斷估唔會見光死，如果有中交建業績後一半嘅表現已經和味。由於高鐵有債務同秋後算帳問題，的確有資金轉咗去玩中交建，但中鐵除咗靠高鐵之外，喺城軌鐵路同地鐵亦佔有優勢，依然係中長線之選。

戰報

信義玻璃（00868）+16%

信義股價尋日又創8.23元新高，小尾本月三日已經吼實，於當日低位7.1元上車，最多賺近16%。

人和商業（01387）+13%

古晨尋日推介人和商業即日落鑊，吼中於1.24元低位上車，最高炒至1.4元，即日鮮都賺近13%。

古勝