絲絲講場：大新王祖興初擔大旗
好多財經界名人第二代已經出嚟社會做事，當中有唔少係子承父業，大新銀行集團（02356）主席王守業嘅公子王祖興（Harold）就係其中一個，佢依家係大新嘅執行董事，尋日佢仲好有台型咁講吓公司未來大計。
做足功課 拓證券服務
大新尋日公布業績，絲絲見到Harold，雖然佢喺○四年已經加入大新做執董，但平時比較少見到佢，可能因為咁，大新銀行董事總經理黃漢興（Derek）即刻交個咪畀佢，畀機會後生仔表現吓，講吓公司未來嘅發展前景。
唔知係咪由於Harold負責金融業務，所以佢講嘅發展大計都係集中呢個範疇，佢話今年要聘請差唔多200名人壽保險經紀，仲話要將證券服務中心由23家增至30家，希望未來3年將非利息收入增至30%。
講咗咁多數據，睇嚟佢事前真係做足準備工夫。
絲絲聽到身邊有啲行家讚Harold幾靚仔，佢仲鬼咁親切咁走埋啲行家度傾偈，話第時要多啲見面喎。
絲絲係度諗，好少Banker好似佢咁Nice，希望佢真係記得約見面啦，因為佢尋日話冇帶卡片，絲絲惟有等佢下次約見面時再攞過。
余絲韻