市場熱線：一拖估值仍然合理

呢排啲業績股大部分「見光死」，好似尋日勵晶（00575）、中動向（03818）、昆機（00300）、萬裕（00894）同亨得利（03389）全部入晒跌幅榜，雖然亦有中視金橋（00623）、映美（02028）榮登升幅榜，但只係「小」貓兩、三隻。古勝推測原因係孖屐對公司來年業績唔多睇好，起碼喺基數提高之下好難再有咁高增長，所以紛紛趁好消息出貨。國壽（02628）成績表其實合乎預期，但尋日亦跌2%，之前炒輪博反彈嘅就輸到甘。

體育股平未必係好

祖國飛機股尋日炒上，南航（01055）升7.6%，東航（00670）升3.2%，唔怕業績見光死乎？而且東航自己估計今年盈利會差過舊年，冇錯，人仔升值對飛機股有利，但油價升又顯然不利喎！中動向插逾一成，仲拖累其他體育用品股一齊跌，但最細嘅飛克（01998）反而升6.2%；中動向嘅一○年PE係8倍多啲，息率有8厘半，現金佔市值38%，估值愈平顯示前景睇得愈差，顯然孖屐睇死公司今年會繼續衰落去。

日本核輻射搞到食水都有問題，幾隻奶粉股又再炒過，照計中綠食品（00904）亦受惠，因為公司一向有加工食品出口去日本，尋日中綠同超大（00682）分別上升3.6%同4.2%，但兩間公司都令人唔放心，尤其中綠上次畀美林話佢嘅產品突然失蹤之後。幾隻農業股都奇奇怪怪，例如亞洲果業（00073）又係業績靚爆鏡，但股價亦係升唔起，農業概念股結果仍係揀化肥股同農機股第一拖拉機（00038）最正路。

其實唔單止日本，全世界都面臨糧食危機，所以阿爺上個禮拜公布咗7招催谷糧產，包括爭取今年糧產超過1萬億斤，新增支農資金100億人仔，主要係完善糧食直補同農機具購置補貼政策等，好可能今年一拖受惠嘅農機補貼又會增多。

逢低吸納持長線

一拖啱啱用800萬歐元買咗一間法國破產公司，金額唔大但可以提高本身技術；公司聽日會派全年成績表，驚唔驚會見光死呢？

老古一向視一拖為長線投資，所以唔會理股價短期波動，股價回落更加係趁低吸納良機。而且股民主要驚住踏入一一年好多公司業績會無以為繼，但一拖喺國策支持之下仍係前景一片光明，下半年亦係傳統淡季，全年業績已喺上半年打好底，一○年PE會回落到17倍左右，穩穩陣陣揸住佢好過亂咁博。

古勝