市場熱線：恒大值博率不俗

其實港股上周五已夠樣衰，外圍明顯好好哋，日股升244點，滬綜指升9.6點，標普期貨亦一路升緊10點，結果恒指收市只升得15點，國企指數臨尾更喺石油股拖累之下倒跌，恒指一上到22,400點樓上已見沽壓，支持位變咗阻力位就幾麻煩。

不過，二三線股繼續有似樣反彈，連核電股都回升，其他汽車股、零售股、中港地產股均「災後重建」，大戶主要係針對指數股，有分析話日資沽貨班資回朝，呢樣雖合乎邏輯但冇真憑實據，又唔見人哋美股同美債被質低？所以老古認為主要係期貨淡倉作怪。

中國建築（03311）又玩供股，○七年七月同○九年八月亦供過，3次都係5供1。不過，睇番前兩次供股之後嘅股價表現都唔差，建築市道又咁好，可以考慮低吸。老古翻查紀錄時同時發現，間公司呢年幾不斷有購股權行使，總數達46球，行使價全部都係0.2345元，折讓9成幾，班管理層帳面獲利3億銀，直情係打工皇帝！

老古叫大家留意可能有股權爭奪戰嘅中國燃氣（00384），澄清條數冇問題後復牌連升兩日，上周五更升6.4%重上3蚊，呢3個月來攞咗8個內地項目，又用5億買石油氣零售業務，可見係新人事新作風。

祖國加存款準備金率已加到麻木，其實睇二月經濟數據，大家已預咗加，點知日本發生地震，以為阿爺會睇定啲先，但始終都係先下手為強。祖國遲早會再加息，對樓市有幾大衝擊好難估，不過上周五內房股就報復性反彈，又話呢排樓盤成交大跌兼要減價，但睇幾隻內房股成績表都係超級吸引，所以反彈亦屬正常。

土地儲備位列前茅

好似恒大地產（03333），會喺下個禮拜二派成績表，但已發定盈喜，往績PE係41倍，但預測PE得8倍幾，業績前NAV係每股6.57元，股價折讓45%，今年頭兩個月合約銷售額升兩倍，到143億人仔，每平方米平均價亦升9.7%到6,828元人仔。公司係全國土地儲備一哥，有9,600萬平方米，拋離第2位綠地（03900）1倍有多，淨係舊年已增多5,098萬平方米，公司特別主力發展二三線城市，受惠於二三線經濟增長較快，地價平風險低，亦冇咁受宏調影響咁大，管理層仲話未來一至兩年喺三線城市嘅比例會由40%升到60%。

不過，恒大亦計劃同市政府合作發展保障房，作為向大城市進發嘅起步點，雖然保障房賺得唔多，但正所謂山大斬埋有柴，股價跑贏其他內房股，自然係有佢嘅理由。

戰報

卡姆丹克（00712）+18%

卡姆丹克上周五一度抽上3.65元，帥哥上周三已作推介，當日低位3.08元，跟到足可賺逾18%。

中傳動（00658）+12%

古晨上周三亦睇中隻中傳動，當時低位只係11.48元，上周五升至12.9元高位，賺逾12%。

古勝