絲絲講場：金石上到市「破底」唔Mind
呢排外圍市場人心惶惶，隻隻新股都好似危危乎，金石礦業（01380）尋日首日掛牌即跌穿招股價，但董事長兼首席執行官陳濤仍一臉紅光滿場飛，睇嚟完全唔在乎喎。
陳濤同絲絲講，話今次金石上市過程有驚無險，喺招股期間，利比亞爆發動亂，眼見幾隻新股都要押後，金石上到市已經好好，股價跌少少都唔在意。金石係做雲石礦開採業務，陳濤送畀港交所嘅上市禮物，就係一隻精美嘅雲石老虎，係佢特登搵師傅雕，祝願港股虎虎生威。金石今次攞個靚冧巴1380，亦例牌送咗100萬元畀公益金做善事。
佢話日本大地震對金石冇乜影響，反而未來日本重建，或會增加入口中國嘅雲石，對公司生意應有幫助。
余絲韻