絲絲講場：謝湧海食魚生冇有怕
日本核電廠爆炸搞到人心惶惶，前日更加出現搶鹽潮，真係嚇死人！中銀國際嘅客戶服務中心尋日開幕，絲絲見到佢哋嘅副執行總裁謝湧海，梗要同佢傾吓時事啦，佢話啲人搶鹽好傻，未抗輻射先搞到自己個腎有事。佢仲話自己前晚先食完魚生，由於香港好多魚都唔係日本嚟，知道啲魚來自挪威就好放心食。
佢又話喺好耐之前已經去過重災區仙台，大讚海景一絕，叫絲絲成班行家待當地重建後一定要去睇吓，仲要試吓倒轉嚟睇，話可以睇到傳說中嘅「Fairy Land」喎。
絲絲之後又見到中銀國際董事總經理黃仲文（Sunny），佢話有次與謝湧海坐的士，的士司機唔肯載佢哋，佢心諗點解司機夠膽拒載，點知司機問係咪胡主席微服出巡。絲絲即時笑到肚痛，唔知謝生與領導係咪用同一隻髮乳或幫襯同一個髮型師呢！
余絲韻