絲絲講場：冼博德求教舊Boss？
出咗名喺大忙人嘅渣打集團（02888）行政總裁冼博德（Peter），尋日抽空會見傳媒，應付記者嘅激烈提問後，佢喺夜晚都有機會抖番吓，事關渣打嘅舊同事尋晚搞咗個聯誼聚會，佢亦都會參加。不過輕鬆一晚後，Peter今日又要重拾忙碌嘅行程，飛去北京公幹。
戴維思大駕光臨
尋晚嘅渣打舊同事活動，除咗Peter之外，仲有一個大家好熟悉嘅重量級人物參與，佢就係渣打前主席戴維思嘞。
講到戴維思，大家一定會記得佢任內嘅傑作，就係帶領渣打進軍韓國，收購咗南韓第一銀行（現稱渣打第一銀行），即時為渣打帶嚟重大貢獻。不過有指渣打尋日宣布關閉韓國27家分行，莫非幾年唔夠，佢哋就要撤出韓國？
Peter就對此解畫，話佢哋係重整分行網絡，以提供更佳嘅服務效率，部分分行關閉係因為地點冇咁理想，並唔符合經營成本效益。Peter仲話，渣打未來會維持喺韓國嘅投資及業務，並強調亞洲係渣打其中一個重要盈利增長動力來源嘅地區。
講到尾，Peter都係想實現渣打今年嘅目標，即係集團收入有雙位數增長，唔知尋晚Peter見到戴維斯，會唔會向舊Boss請教心得呢？
余絲韻