絲絲講場：新地力吸內地豪客送瓏璽紀念郵票
內地豪客已成為本港豪宅新盤主力吸納嘅客源，新地（00016）近排積極部署開售嘅西南九龍新盤瓏璽，度咗啲新搞作冧客，就係送瓏璽紀念版郵票，再創本港新盤吸客招數先河。絲絲以前都收過一啲內地公司紀念品，形式同佢哋嘅相近，睇嚟呢招喺內地應該幾有用。
新地暫時仲未為瓏璽喺香港正式展開推廣，但發展商尋日起已率先開放設喺深圳福田嘅大型展覽館，仲特別與香港郵政合作，耗資60萬至70萬元印製1,888套瓏璽紀念版郵票，送畀首1,888名參觀深圳展覽館人士作為紀念品，擺明力吸內地豪客。
落重本拍立體短片
除咗派紀念郵票之外，新地今次仲耗資近500萬元，拍攝一套約8分鐘嘅立體短片，喺展覽館內播放，透過短片向參觀者立體「晒冷」，介紹新地喺中港兩地眾多地標物業發展威水史，當然唔少得推介瓏璽嘅設計理念等賣點，絲絲尋日有幸先睹為快，睇片後立即對瓏璽加深咗印象。
余絲韻