內地富豪數目與日俱增，《福布斯》嘅中國富豪榜都係咁講，絲絲經常睇到有關報道，話內地富豪嘅豪門夜宴幾咁巴閉，最近又聽到一單，有幾巴閉？就係要由酒店安排約200名員工搭足12個鐘頭車，成就一個為期4日嘅豪華婚宴。
話說喺去年有位山西富戶要搞婚宴，誠邀酒店提供婚禮到會服務，為咗貫徹以客為尊嘅精神，酒店當然做足100分，既然要動用200名員工，冇理由坐公共交通工具，於是佢哋專程動用6部旅遊巴士及6部貨車，將員工及需要嘅物資運送到山西。負責呢次宴會嘅酒店，就係坐落喺北京東方廣場嘅北京東方君悅大酒店，而東方廣場嘅業主就係長實（00001）。
絲絲仲八到，呢次北京東方君悅大酒店「揮軍南下」，總共招待咗約1,000名貴賓，每位收費約6,500元（人民幣‧下同），即係話成個婚禮總值約達650萬元。咁揼本舉行「人生大事」，相信酒店服務質素真係畀到客戶十足信心。
北京東方君悅大酒店開業短短10年已獲獎無數，曾獲「北京最佳商務酒店」、「中國百佳酒店」及「亞洲最佳25家會議酒店」等殊榮。唔講唔知，籃球明星姚明早年迎娶葉莉，都選擇喺呢間酒店擺宴。
余絲韻