絲絲尋日與一位財務專業界老友吃飯，席間佢講到現時經濟逐步好轉，好難留得住人才，又話啲公司即使制訂咗人才策略亦唔係太掂，令佢感到有啲可惜。
呢位老友拎咗份由ACCA及畢馬威做嘅報告畀絲絲睇，報告話財務人才嘅培訓、開發及留用對企業嘅成功至關重要，尤其喺依家嘅經濟環境下，未來10年對財務人員嚟講係重要嘅機遇，有望為企業創造及保持長期價值。不過，報告發現去年只有20%嘅企業團隊制訂咗人才策略，但當中絕大部分又根本唔算得上係策略，言下之意，即係話未能有效留住人才。
絲絲聽完後都有同感，好多公司都冇制訂完善嘅留住人才計劃，即使有亦只做表面工夫，口惠而實不到，就好似內地依家鬧民工荒，老闆請人只象徵加少少人工又點可以請到人呢？絲絲知道一啲聰明嘅老闆就識得加人工，畀埋培訓、制訂升遷途徑、改善福利，年尾送埋員工返鄉下過年，你話點會冇人爭住做呢？
余絲韻