中國燃氣（00384）嘅董事被捕事件，擾攘咗近3個月仍未完結，尋日公司再停牌半日，原來係公布罷免董事，其中罷免劉明輝董事職位嘅理由都幾特別，公司話係由於冇合理希望可於三月三十一日前取得劉明輝自願辭任，故董事會以多數票通過，即時採取罷免劉氏出任董事嘅程序。
今次被罷免董事職位嘅仲有李小雲及徐鷹，喺本月初佢哋原本嘅主席及副主席職務已被解除，今次係進一步取消董事職務，原因係有部分董事會成員認為兩人喺去年十二月二十三日，第一次就兩名管理層被內地公安逮捕事件舉行嘅董事會會議內，並冇完全披露佢哋對事件嘅了解。
中燃因管理層劉明輝及旗下中裕燃氣（08070）執行董事黃勇被深圳市公安局以涉嫌職務侵佔罪作出拘留並進行調查，公司早前出過通告，話根據中國法律顧問報告，推斷事件涉及中燃喺○四年期間，收購湖北省4個城市燃氣項目及一個湖北省長輸管道項目，最差嘅情況係將有關1.78億元全數註銷。
公司管理層尋日話，集團嘅日常運作由高級管理人員管理及由聯席董事總經理監督，業務保持正常運作。
余絲韻