依家香港經濟基調良好，就業市場暢旺，加上三月份係傳統嘅轉工高峰期，金融界嘅「音樂椅」自然繼續轉個不停。今次嘅主角就係「雙黃」－－黃紹開及黃耀明，仲要咁啱兩人都曾經喺海通國際證券（00665）共事過。
海通尋日公布業績，順帶宣布公司有人事變動，當中最令人矚目當然係服務咗海通（前稱大福證券）23年嘅黃紹開（Peter），佢會喺股東周年大會結束後辭去行政總裁、副主席及董事總經理等職務，可謂完完全全地從海通退下來。
絲絲尋日搵唔到Peter，問唔到佢點解要走，不過行內人士估計，大福嘅股權賣咗畀海通已一段時間，Peter作為老臣子協助公司過渡，可以話係功成身退，依家走都唔算意外。
海通嘅公司通告都話，Peter與董事會之間並冇任何意見分歧。
Peter原來嘅三個職銜，就會由現任聯席董事總經理兼執行董事林涌接替。除此以外，李明山亦會辭任非執董及主席，未來嘅主席職位就會由現任非執董吉宇光擔任。
至於縱橫外匯界多年嘅黃耀明（Bruce），早前亦已辭去建達（香港）策略分析主管嘅職位，暫時以獨立身份評論大市。事實上，Bruce由工作咗4年多嘅海通，加薪近倍轉投建達都只係去年初嘅事，今次咁快又轉工，或者又有好路數！
余絲韻