市場熱線：中國鋁業漸入佳境

港股經過前日小V之後，恒指尋日升得22點的確嫌奀，衰在祖國移動（00941）派完成績表後先升後跌，由高位碌落超過3%，究竟孖屐有乜咁唔滿意呢？低增長已係意料中事，PE啱啱10倍，周息率4.24厘，淨係收息已多過兩電（00002及00006），古勝維持等70蚊樓下入例飛捧場。

股份表現強者愈強

地主股個別發展，錢莊加按息有一定影響，古勝睇見日本房屋好似積木咁被大水沖走，想起曾經何時日本樓市又係貴到飛起，結果泡沫一爆就衰足20年，值得香港樓市借鏡。藍籌股除咗祖國移動特別衰之外，思捷（00330）尋日再創52周低位，唔知點解公司成績表明明差過預期卻炒到40蚊樓上，然後班機構投資者速速掟貨。

依家又有番強者愈強、弱者愈弱嘅感覺，尋日信義（00868）、中興（00763）同中建材（03323）同創52周新高，業績係分水嶺，好似金蝶（00268），在下早前推介話從股價表現可以推測業績唔差，結果派完成績表後尋日升一成；而比亞迪（01211）跌到30蚊後急彈兩成，但輾轉又回落到30蚊邊。

雖然大隻佬表現麻麻，但紅色分子以至二三線則好好多，國企指數升0.72%，成交雖然由過千億回落到841億元，但已唔算差。尋日藥股無端端翻生，如果炒救災概念可能捉錯用神，皆因日本海嘯死嘅人多、傷嘅人少，但香港連碘酒都有人搶購，炒藥股又有乜出奇？

雙匯傳佢嘅豬肉有「瘦肉精」，A股停埋牌，亦拖累埋雨潤（01068）同神冠（00829）下跌，雨潤即刻澄清佢嘅豬肉冇問題，競爭對手「出事」，佢應該開心至啱。

尋日最醒嘅藍籌股係中國鋁業（02600），H股升3.6%，A股更漲停板，事緣佢阿媽同廣西政府簽約開發廣西稀土，其實佢阿媽近年好多搞作，頻頻收購海外資源，但幾時先益到個仔？

加強盈利雙管齊下

查實中鋁嘅前景一路轉好，淨睇國際銅價早排衝破每噸1萬美金創咗歷史新高，鋁係銅嘅平價替代品，所以鋁價跟住升係理所當然，中鋁月初亦公布氧化鋁現貨價調高3.45%到每噸3,000蚊人仔，但距離銅價仍差一條街，銅價如果繼續高企，勢必焗住廠家用鋁代替，咁樣鋁業供過於求嘅現象亦會紓緩。

值得注意嘅係，中鋁管理層話今年希望透過控制成本以節省22.5億銀，例如集中採購就可慳番7億銀，瑞信出報告亦估計中鋁喺慳家方面會有驚喜，維持跑贏大市評級同目標價9蚊。中鋁一○年PE係105倍，但產品加價同節省成本雙管齊下，今年會係轉折點。

戰報

信義玻璃（00868）+24%

信義尋日強勢破頂，高見7.95元，古晨本月一日推介時低位僅6.38元，跟到足賺超過24%。

東岳集團（00189）+15%

東岳尋日同創新高5.74元，詩詩於本月一日已吼中，於當日低位4.98元上車，最多可賺逾15%。

古勝