市場熱線：保持冷靜謀定後動

最差嘅時候，滬綜指跌近3%，日股暴瀉接近1,400點，係前日跌幅嘅兩倍，收市仍插過千點，感覺似係核爆多啲；日本今時唔同往日，本身內傷再加埋今次躓多兩槌，肯定有排醫。有人話，日本錢班師回朝，搞到全球魚缸遭殃，但其實大家都係靠估，幾個大粒佬異口同聲話未見資金流走。yen未見有太大波動，如果yen再升嘅話會對日本經濟雪上加霜。

散戶積極買熊仔

其實，好多股民都等緊「終極一跌」，「勇字派」撈底大不乏人，恒指跌幅亦逐步收窄，A股更係跌少一半。埋單計數，恒指跌667點，但期指低水116點，執筆時德股跌4.75%，道指期貨跌緊280點，港股係咪見咗底好難講。古勝成日講呢排技術分析靠唔住，當恒指跌穿22,400點嘅「三底」時候並冇見人踩人事件發生，恒指收報22,678點亦未算跌穿窿，唔賭邊有得博？不過，家陣應該保持冷靜，謀定後動，候低吸優質股。

尋日成交過千億，自從上個禮拜食飯時間減到個半鐘之後，第一次見股民食完飯拿拿臨返證券行(目及)住個市。而期指成交亦同步升到17.6萬張，但窩輪成交反而減少15%，佔大市成交僅一成多啲，牛仔劏咗77隻，散戶借勢積極買熊仔博繼續尋底。

幾隻核電股冇運行，其實福島個老爺核電廠出事，今日嘅技術點同40年前比？但人命無價，祖國話要發展核電肯定會遇上較大阻力，亦益咗風電同太陽能，古勝尋日講中傳動（00658），但漏咗金風（02208），呢隻至係尋日真命天子。

尋日升嘅股唔夠100隻，跌嘅股超過1,000隻，創52周新低嘅股亦過百隻，逆市奇葩除咗再生能源股之外，華潤水泥（01313）創新高認真巴閉；環乳（01007）今日派成績表，預期PE10倍樓下有得炒業績；志高（00449）早段成交同股價都好犀利，斷估公司嘅OEM業務會受惠於日本電器廠停產；霸王（01338）有瑞銀唱好有新包裝（唔通冇咗佢老細個嘜頭？）亦升5.8%；最離奇係中國太平（00966），佢係唯一要賠錢嘅保險公司，但股價卻先跌後升。

數碼通大有錢途

值得一提嘅仲有數碼通（00315），升6.8%收報28蚊，同52周高位只差5毫子。電訊股始終較為穩陣，大部分人已轉用3G，數據收入愈來愈高，數碼通諗住收起個無限上網計劃，實行用者自付，遲吓有「哎瘋5」，將來又有4G，依然有睇頭！

戰報

志高控股（00449）+15%

志高昨成逆市奇葩，最高抽上0.76元，古晨上周一叫吼實，當日低位0.66元上車，賺逾15%。

國中控股（00202）+10%

詩詩上月二十八日吼中嘅國中，尋日一度升上1.6元，較推介日低位1.45元，累升逾10%。

古勝