「業績期，未忙夠？」正正道出筆者近日嘅工作，財務公關電話一個接一個，電郵一封又一封，真係辛苦，不過為廣大粉絲追蹤，無怨無悔。
上星期剛出席咗中交建（01800）業績發布會，盈利升咗30%，超晒標，成交亦突然「動起來」，價升量增，必定要留意。中交建過去表現令人失望，自金融海嘯起計，由高位回落到依家超過70%，一直喺低位「左行行，右行行」，隨住業績回勇，加上主席話今年嘅策略係──強高，穩中，棄低（意思即係強化高端客戶，穩定中端客戶同放棄低端貢獻毛利比較少嘅客戶）。
棄低利潤項目明智
呢個策略正正將各大分析名家對佢嘅批評，「項目多，毛利少」嘅缺點而封咗佢哋把口，其實咁樣做亦都符合策略管理理念，呢種做法可以慢慢將企業嘅毛利率增加，濫做亦都對中交建嘅發展帶來不利。回歸A股成為咗今年嘅一個投資激發點，隨住中交建發行唔多過35億股A股，加上以換股方式合併路橋集團，為未來嘅發展去鋪路，似乎中交建已經慢慢由沉睡而醒番，回勇敢話。
從技術分析嚟睇，陽燭而起加大成交，如果過多幾日都企穩7元樓上，可以繼續追蹤，以三個月8元做第一個目標，出發！
香港大學電子金融服務榮譽助理教授 徐燦傑