股票市場從來係只講回報的地方，所以不論股民對日本地震災民有多同情，但落到場，有理無理，一眾災難受惠股都係衝咗至算。不過，以○八年四川地震為例，所謂的災後概念股，炒一陣後多數打回原形，所以勸大家炒吓無妨，只要諗吓日本市場的對外開放程度有幾大，就可以知道一啲所謂受惠股根本係得啖笑。
半導體股尋日亦因日本廠商停產而炒上，詩詩一直有留意嘅華潤微電子（00597）升3.85%，收報0.405元。
不過，其實就算冇地震因素，隨住全球消費電子產品市場的興旺，半導體行業早已處於上升周期，加上旗下綠色照明和節能產品業務亦同樣表現出色，令華潤微電子去年中期業績成功扭虧為盈，賺1.26億元，而公司將於下周二公布的全年業績，自然令人憧憬。
詩詩以全年賺3億元計，每股盈利0.034元，市盈率不到12倍，上番52周高位0.47元，亦不到14倍，止蝕位可訂0.37元。
詩詩