恒大地產（03333）尋日又喺香港舉行每月一次嘅銷售簡報會，向大家講吓佢哋二月嘅合約銷售情況。近期新西蘭、雲南、日本等地都先後發生地震，對於發展項目遍布62個內地城市嘅恒大嚟講，佢哋嘅樓盤防震程度係點，都相當值得關注。
恒大副主席兼行政總裁夏海鈞話，其實中央政府對內地唔同地方嘅樓宇，都有唔同嘅防震要求規定及指引，佢以成都為例，當地嘅樓宇防震程度就要達到7至8級以上嘅規定。雖然咁樣無疑會增加公司嘅建築成本，不過恒大嘅樓盤當然會跟足呢啲指引嚟做啦，因為安全第一嘛！
夏總又話，上周雲南發生地震，公司未有項目受到影響，至於鄰近嘅昆明項目，所有工程亦都可以如期進行。
余絲韻