國美電器（00493）由張大中「順利」接替陳曉出任主席一職，之不過傳出有「餘震」，話管理層即將大變動，國美即刻澄清話冇咁嘅事，仲特別講明「國美電器股東和董事會在戰略和經營管理上高度一致。」
市場人士估計，管理層變動可能源於喺「黃陳之戰」（即黃光裕及陳曉）曝光初期，國美副總裁孫一丁及李俊濤曾經講過「如果國美沒有未來了，我們留下也沒有意義」，於是市場解讀為管理層決定與陳曉共存亡。
根據熟悉內情嘅人話，其實依家大股東亦極力與管理層搞好關係，黃光裕太太杜鵑回歸國美之後，好積極咁與管理層及投資者溝通，兼且「列席」及「旁聽」國美董事會會議，唔似係想清除舊臣。
好多接觸過杜娟嘅基金經理，都對佢嘅辦事能力豎起大拇指，話佢管理天分唔差過黃光裕，對財務非常熟悉，能操一口流利英語，甚至喺國美員工中無人能出其右。
杜鵑認為「零售企業的競爭最終會體現為人才的競爭」，佢喺國美實施人才「蓄水池工程」， 即國美嘅人才喺通過常規嘅招聘、內部培訓以外，仲通過國美自己嘅商學院，為中高層進行系統嘅授教。既然落咗咁多功夫，冇理由趕班管理層走吖！
國美嘅局面係咪會保持穩定，仲要時間證明，但聯交所股權資料顯示，摩根大通喺上周就減持咗1,245萬股國美股份。
余絲韻