市場熱線：鞍鋼有條件再升

恒指由下跌170點到倒升96點，睇你夠唔夠膽博，但成交額得651億元，好多股民仲係心有餘悸；國指因資源股帶動，升幅有1%；標普期貨上晝最多跌8點幾，下晝跌少咗，A股亦係先跌後微升，但其實最受惠係南韓，汽車同電器都短期少咗個勁敵。好多人驚住日本錢會班師回朝，但結果口yen先升後跌。其實好多次天災人禍對股市只係短期影響，不過，日本已變咗「東亞病夫」，復原能力唔同九五年神戶地震嗰時，依家孭債係GDP兩倍，全球經濟又要重新計數。

重新審視核電安全

依家嘅焦點係核輻射多過餘震同死亡人數，祖國原本諗住大力發展核電，但肯定多咗好多反對聲音，當年美國發生三浬島事件之後，搞到咁多年都聞核色變。所以尋日東方電氣（01072）、上海電氣（02727）、中核（02302）幾隻跌得最甘，相反其他新能源股好似保利協鑫（03800）、中傳動（00658）就間接受惠，兩隻股之前嘅表現係美女同醜女，但醜女更有條件大反彈。

另外，同日本做生意嘅公司亦畀人沽，億和（00838）舊年話攞咗36億元日本客戶辦公室自動化設備定單，暫時唔知受到幾大程度影響，但孖屣一有風吹草動就沽之哉；而中港照相（01123）轉行做日本護膚品生意，會唔會驚輻射呢？海產同農作物就肯定有心理影響，日本食品貴到飛起皆因「健康」有價，呢排啲日本料理肯定少好多生意。不過，祖國食品股尋日尾市炒起，食品出口去日本嘅公司其實得中綠（00904），呢隻再跌3%。

總之，炒股係要發揮好多聯想力，資源股尋日集體上升，古勝尋日講隻三林（03938）升達12.3%，其餘木材、煤炭、水泥、鋼鐵全部炒災後重建，連油股都升埋一份，其實受惠程度好唔同，水泥因運輸困難未必有着數，而日本地震發生喺工業重鎮，好多間煉鋼廠可能要停產半年，日本係舊年最大鋼材出口國，減產就會由中國同南韓執二攤，所以鋼鐵股升得有道理。

直接受惠日企減產

另外，日本鋼廠停產令鐵礦石同焦煤需求減少，間接令祖國鋼鐵股減低成本，如果日本重建帶動鋼價上揚嘅話亦係有利。傳統上，四、五月係鋼鐵業旺季，鋼鐵股跌咗咁多本來已醞釀反彈，加埋日本地震，鋼鐵股短期可以睇好。鞍鋼股份（00347）由年初12.7元一度跌到10蚊樓下，尋日反彈上10.84元收市，破埋下降軌道，應該有餘未盡。

戰報

台一國際（01808）+22%

古晨尋日話隻台一有注資憧憬，又畀佢貼中，低位0.41元上車，0.5元高位食胡勁賺近22%。

萬德資源（08163）+14%

帥哥尋日吼萬德資源果然脫離仙班，高收0.112元，於低位0.098元入場，即日食胡賺逾14%。

古勝