市場熱線：中國水務睇位翻兜

太平洋實業（00767）折讓9成、1供30，依家細價股供股手法愈來愈毒辣，隻股尋日低位0.45元、高位1.25元，收中間價0.88元，直情舞龍咁舞。講到供股，有好多唔合理嘅地方，如果採用「公開發售」方式，唔使買賣威士、冇碎股安排、冇額外供股申請、甚至唔使開股東會通過，而供股開股東會竟係除權之後，點保障散戶？

國美可考慮低吸

國美（00493）宣布陳曉落台，大中電器創辦人張大中接棒，國美嘅爭奪戰好睇過荷里活大片，其實阿爺點會畀全國電器龍頭由外資揸旗吖， 故黃光裕攞番控制權、CEO換人相當正路。國美執過位之後，業務可望重新返回正軌，趁低吸納有得諗。

另外一間公司亦傳有爭奪戰，就係是非多多嘅中國燃氣（00384），《第一財經日報》報道，代表國台辦海峽金融嘅正、副主席日前被罷免，最主要原因係董事局權力之爭，而公司單一外資大股東南韓SK集團正虎視眈眈。中燃股權好分散，有SK、海峽金融、中石化（00386）、阿曼石油、印度GAIL同埋原主席劉明輝，直情好似聯合國，下落不明嘅劉明輝所持股份最後花落誰家係焦點。

照計國美點都唔肯落入外資手，燃氣屬於更敏感嘅能源項目，更唔會畀韓國佬得米。總之，中燃值得留意，呢個禮拜核數師會出審計報告，到時就知公司資產有冇被挪用，股價跟住會有兩個後果，過咗呢個風暴之後有機會重生。

水嘅重要性唔使多講，《一號文件》重點搞水利可見一斑。但水同燃氣一樣，阿爺要遏通脹所以短期唔使旨意加價，不過長線可以睇好。

大搞水利長線好

古勝上月初推介過中國水務（00855），上月二三線股曾經大洗倉，但隻股跌得唔算勁，近日回升之後，仍稍高過上次推介時價位，而一、二月啱啱好係兩個一模一樣嘅波浪，高位約3.2元，低位2.83元，自從舊年十月以後都係呢個範圍上落，咁嘅形態唔係收貨就係散貨格，但睇上月股價一回落，大股東同西京即見增持，應該唔會死錯人。

中國水務主要業務係做供水，同其他水股主要做污水處理唔同。水股炒完《一號文件》並冇散水，皆因今次並非炒概念咁簡單，中央泵水4萬億人仔去投資，「水位」肯定多咗！

戰報

志高控股（00449）+21%

桃桃睇圖有一手，上月二十五日吼中嘅志高，尋日升至0.74元，以當日低位0.61元計升逾21%！

奧亮集團（00547）+19%

古晨上周二推介嘅奧亮集團連日飆升，尋日搶高至0.335元，較推介當日低位0.28元累升逾19%。

古勝