好多香港人已慣咗用「任上」嘅上網月費服務，不過CSL行政總裁歐康年（Joseph O'Konek）奉勸大家唔好以為係必然嘅事，佢預言喺未來12至24個月，市場會出現改變，「任上任用」唔一定係手機商搶客嘅唯一手段！
月包計劃如果真係成為歷史，係咪代表手機上網要加價？歐康年就話，以月包無限上網作賣點雖然有助手機上網嘅普及，但長線嚟講就不利市場嘅健康發展，網絡資源過度消耗，最終都係不利消費者嘅利益；相反若服務計劃能做到用者自付，用手機作一般上網嘅用戶反而有機會畀少啲錢，用手機作BT或睇3D內容就可以用到有需要及具價值嘅服務，反而更有利市場發展。
佢話CSL目前係本港擁有最多手機頻譜嘅營運商，即使客戶去年嘅數據用量按年急升3倍，網絡仍應付有餘，管理層目前亦唔認為要即時叫停「任用」月費計劃。佢仲話根據美國獨立機構調查，CSL流動數據傳送速度喺世界排名第3，而4G LTE亦會喺本月底開始進一步向市場推出，喺搶攻4G嘅部署上明顯領先對手！
（余絲韻）