網上交易平台盛寶金融（香港）年初登陸香港，尋日管理層「晒冷」見傳媒，當然唔少得上台致辭環節，喺香港工作咗7年嘅董事總經理李紀綱（Francis）完全掌握本港熱話，一開口就話自己夠資格拎政府即將派發嘅6,000大元，仲話自己會用呢筆錢，買多幾張機票返台灣老家。
Francis嚟咗香港7年，完全掌握都市人嘅生活節奏，就係一個字：「趕」，由於屋企人都喺寶島，每周五收工後，佢都會坐夜機返台灣，到周一朝早再飛返香港工作，返老家除咗見屋企人之外，佢話每周末仲要去輔仁大學做客席講師，幫補吓啲機票錢喎。
講起政府即將派嗰6,000蚊，佢話會用嚟買多幾張機票返台灣，仲叫大家收咗錢後都買機票去台灣玩，佢經常港、台兩邊飛，就一口氣買咗30張機票，貪可以平啲。Francis講得一口流利廣東話，原來係睇電視劇學番嚟嘅。
（余絲韻）