市場熱線：海爾升浪未見頂

油金價回股市彈

恒指尋日大升接近4舊，收報23,711點，除咗升穿50日、100日線之外，亦升穿咗下降軌。不過，美股、油價同金價依然好反覆，道指隔晚就先升後跌，但講到「狂人」已準備着草，消息好難分真假，但大戶存心「玩嘢」，大笨象（00005）話美國唔准收樓有重大損失，但尋日回升2.3%帶起個市。期指高水29點，計埋除息即係大高水，睇吓美股尋晚係唔係有料到。

滬綜指差唔夠1點就重上3,000點心理大關，但已創咗4個月以來收市新高，祖國再次減藥價，搞到中港藥股尋日都唔多精神，祖國話明要控制物價，而藥價重要性僅次於糧價，所以調控在所難免，相信藥股短期仍會跑輸大市。不過，上海醫藥下個月會來香港集資近百億，咁大隻股會唔會帶起番啲藥股呢？

油價回軟番啲，中石化（00386）即刻反彈3.63%，但油價已經升咗咁多，就算畀佢加成品油價都補唔番。尋日全部藍籌都升可謂少見，中交建（01800）有大行唱好話佢抵買，而鐵路投資放緩對佢影響亦唔大，加埋今日就會派成績表，尋日升達5.6%。

細價股方面，中國戶外媒體（00254）呢排勁升，今年初有大批CB以每股0.2元行使，依家獲利近一倍多。

又有一隻升得唔算好勁，但已經連續6支陽燭嘅係海爾電器（01169），低位累升18%，高盛前日唱好白電股受惠於保障房建設，但主要唱好對象係海信科龍（00921）。海爾電器則有瑞銀點題，話同公司管理層傾過，講明會繼續做大綜合管道業務，未來計劃向阿媽收購售後服務，甚至不排除將洗衣機同熱水器製造業務賣埋畀青島海爾，咁樣分工就好清晰，A股嘅青島海爾做晒白電旗艦，海爾電器則專注做分銷零售一條龍，即係「農村國美」。

農村市場商機大

究竟做製造抑或銷售好搵呢？單係計分銷、物流同售後服務嘅毛利率無疑係偏低，但山大斬埋有柴，依家佢哋分銷嘅電器牌子九成係海爾自家人，得一成係其他牌子，但管理層估計未來3至5年，海爾同其他牌子銷售比例係各佔一半，而農村係強勁增長市場，所以呢盤生意嘅展望比製造業務好得多，股價強勢未必無因。另外，佢阿媽同北歐著名家電品牌Electrolux傾緊合作，亦成為另一可炒因素。

戰報

中信21世紀（00241）+21%

古晨上周五又貼中隻中信21，跟佢喺當日低位0.99元上車，升至尋日高位1.2元，勁賺超過21%。

高寶綠色（00274）+25%

帥哥上月二十五日介紹嘅高寶成功脫離仙班，尋日高見0.111元，較推介日低位0.089元升近25%。

古勝