識我嘅粉絲都知，筆者好少探討政策同相關施政，全因自己嘅本業都未搞掂，邊度得閒去理其他嘢呢，不過見到財爺最終「還富於民」，媒體朋友甚至用「屈服」嚟比喻是次大行動，真係「各自顯神通，屈你做衰公」。
未決定派錢前，有媒體朋友問我點睇呢6,000大元，筆者第一個答案係──命運在我手，應該自己掌握呢6,000元嘅命運，咁樣最後就無得怨天尤人同打死無怨嘅局面。從今次財爺屈服啟示，筆者試圖用我成名嘅營銷絕技──左右圈試圖分析當中奧義，左圈就係我哋所講嘅客戶群同需要分析，即係香港市民，右圈就係今次政府同佢本身嘅核心能力，政府今次又再一次犯咗「唔睇左圈，財爺任我行」嘅局面。
政府有時做嘢真係冇睇「左圈」，最終班老友記透過民怨嘅「聲色藝」再一次令佢哋舉步維艱，然後「亡羊補牢」，最終大家嘅共鳴程度自然減低，「做嘅冇癮，收嘅冇癮」，雙輸，何苦呢？
希望政府喺呢次事件上，好好吸取經驗，用「以客為本」嘅思維嚟制訂相關策略，唔好做武林高手「一意孤行」，送政府兩句筆者嘅經驗所依──萬事旨因左圈起，右圈變動添驚喜，好好思考同一齊實踐啦！
香港大學電子金融服務榮譽助理教授 徐燦傑