絲絲講場：朱邦復盡捐文傳持股
依家唔少公司開始重視社會企業責任，會透過捐錢、做義工等方式去幫人，「倉頡之父」、文化傳信（00343）主席兼非執董朱邦復尋日就宣布，將股份捐畀一家非牟利文化慈善機構，總值約1,190萬元。
文化慈善機構受惠
佢捐畀文化慈善機構嘅股份，包括自己名下約1,201萬股，以及由佢全資擁有公司Bay-Club Enterprises嘅1,227萬股，加埋共佔文化傳信已發行股本約2.35%，轉讓之後，朱主席就唔會再持有公司任何股份權益喇！
其實朱邦復「坐正」做主席都只係一個月多啲，絲絲搵唔到佢問點解揀呢個時候捐股票，不過無論乜嘢理由都好，有人受惠就得喇！絲絲睇番資料，其實朱生咁多年來一直為文化界盡心盡力，當年亦好大方咁放棄倉頡輸入法嘅專利權，開放畀大家一齊研究發展，咁樣輸入法先會普及得咁快。
余絲韻