過埋今日，各位「金魚缸」從業員就要「加辛」喇，皆因港股喺下周一開始加時，真係要做好心理準備，貴為股壇前輩嘅眾利股票公司主席董偉仲細心提醒各位手足們，要小心身體。
下周一開始，早午開市時間各提早半個小時，絲絲有好多輪商、證券行老友都話齊齊校定鬧鐘、飲多杯咖啡等開鑼，至於今日就會約定行家，食「最後一個」悠長午餐。
喺六十年代自立門戶嘅董偉，成立股票公司做「揸Fit人」，話晒喺本港股壇馳騁逾半個世紀咁耐，有乜嘢風浪未見過吖，所以佢覺得今次交易時段進行世紀性改革，技術上冇乜大問題，只係班夥計食飯時間縮短咗，出去食飯要「食快啲」，變相可能辛苦咗個胃，容易造成健康問題喎。
呢位老闆咁錫員工，唔係得個講字，真係有幫大家諗計o架。佢話公司一直都提供午膳津貼畀員工，依家仲諗緊包埋伙食添。「中環下午食飯不嬲都人多，睇吓港股加時頭一、兩日會點喇，依家都有搵伙食公司傾，計落每個月包埋伙食都係幾千蚊啫，到時畀啲員工自己揀出去食，抑或留喺公司食都得。」不過，如果港交所要追趕歐美、澳紐、韓國、台灣呢啲中午無休嘅交易所，金融界從業員真係唔使旨意有啖好食。
余絲韻