市場熱線：東風強得有道理

短炒資金進銳退速

尋日係博反彈嘅世界，繼比亞迪（01211）之後，中國無線（02369）同「田雞博士」（01698）都迴光反照，內房股同體育用品股亦有人追落後。呢幾日買股唔使睇太多基本因素，邊隻跌得多就闔埋眼衝落去，又或者揀派成績表嘅公司炒轉，但呢類短炒資金來得快、去得快，霸王（01338）同「波斯貓」（03998）反彈勢頭曇花一現，思捷（00330）回升冇幾日就被芬佬狂掟貨。

好似中國無線，累跌咗5成，反彈15%仍有排都未返家鄉，想甩身冇咁易。仲有一些股毫無起色，中冶（01618）再跌4%創上市新低，睇佢往績PE係8.6倍、預測PE約10倍，估唔到咁差啫，但夠唔夠膽擺個牌喺3蚊博一博？億和（00838）拉閘，一發完盈喜就抽高批股，浪潮（00596）發盈警之後有芬佬增持，盈喜、盈警好多時係莊家嘅利用工具。

講到反彈，古勝一直話水泥股同汽車股係兩大優先選擇，水泥股呢排真係好勁，海螺（00914）同中建材（03323）距離52周新高只係差少少。至於汽車股則較慢熱，皆因早排已炒過一月汽車銷售數據，表現唔算落後，東風（00489）兩個幾月都係13、14蚊上落，廣汽（02238）更加喺10蚊邊同你鬥悶。

如果鍾意刺激，當然買華晨（01114）同長汽（02333）會較大波幅，但東風同廣汽始終較可靠，東風合營多同車款多，自動分散風險。東風一月賣車209,297輛，同比上升25.86%，比舊年十二月升20.99%，乘用車同商用車同比分別升26.03%同25.31%，比起整體一月乘用車嘅16%升幅明顯優勝，但股價仍係冇乜突破，不過有條小型上升軌支持。

好多人驚住今年所有買車優惠取消後，汽車銷量會大跌，結果一月數字好過預期，之但係，穩陣派仍然唔放心，二月數據好快會由內地傳媒率先披露，到時再升一成幾就唔係虛火。古勝不嬲都話，銷售成績最先知係管理層，而喺股價會預先反映，汽車股呢排硬淨必有因由，東風一○年預測PE得9倍，今年仍會有一定增長，仲想點？

money18 助你縱橫股壇

古勝又有好介紹，市場訊息千變萬化，要掌握最新市場動態及消息，看官可即上money18.on.cc查閱免費即秒股價及市場資訊；iPhone手機用戶更可透過money18 app獲取最新炒股訊息。此外，打電話聽上日行情電話熱線：27958888，更為閣下提供詳盡的股票報價資料。

戰報

中國新電信（08167）+24%

桃桃周三吼中嘅中國新電信，尋日搶高至0.131元，相比推介日低位0.105元，足足升超過24%。

眾彩股份（08156）+17%

古晨上周三睇中嘅眾彩亦都不負眾望，當日低位0.325元，尋日高見0.38元，跟到足賺近17%。

古勝